Changkanna leh hmasawnna kan
hmachhawn dan leh hmandanah kan nihna a lang. Tun lai chanchinthar, khawvel chu
sawi loh kan Zoram chhung ringawta chanchin leng vel te pawh hi kan hriain kan
chhiar vek ang a, internet-ah te kan hmuh a kan chhiar chuan chanchin lawmawm
lam aiin chanchin lawmawm loh lam a tamin, chanchin thalo lam chuan mi a hip
zawk bawk tih kan hmu thei ang.
Kan mit latu leh kan beng
verhtu te hi thil thalo leh suahsualna rawngkai lam a tam tawh hle. Thil
pangngai leh tluangtlam chu chanchinthar ah rau rau pawh ‘a ho’ kan tih tak
tlat nachhan te hi engvang nge ni ang?
Hman deuhah kha chuan kan
chanchinthar hriatna hnar ber chu chanchinbu leh radio te a ni mai a, khata
tanga kan chanchinthar hriat ang ang kha mahni tapchhak zawlah sawizuiin lungawilohna kan nei a nih pawhin kan phun
lungawi ve mai thin. Khatih hun lai kha chuan pawngsual emaw, tualthih thu emaw
te kan hriat chuan kan ip chawih chawih a ni ngai a; Tunah erawh chuan he’ng
chanchinte hi chu chanchinthar pangngai leh thil thleng ve tur reng emaw tih
tur a lo ni zo ta.
Tunah chuan mahni pindan lum
atangin khawvel chanchinthar chu a hmunah kan luhchilh a, internet kaltlangin
chanchinbumi te nen chanchinthar chu kan hre rual thei ta a, chu mai ni loin
kan ngaihdan chu mahni tapchhakzawl mai ni lo, khawvel hriatah kan puangchhuak
ve nghal zel thei ta mai a, he changkanna leh hmasawnna kan neih hi tangkaiin
hlu teh mahse hmanthiam loh chuan thil hlauhawm tak a ni thei.
Hemi kawngah hian kan
ngaihdan kan puanchhuah duh dan leh kan fimkhur leh fimkhur loh a zirin kan
mizia a lang a, midang tan kan tangkaiin kan hnawksak thei bawk. Thumal pakhat
lek pawimawhzia leh pawi a khawih thui theihzia hi ngun taka kan ngaihtuah a,
fimkhur taka kan zalenna leh kan hmasawnna hi kan hman a tul tawh takzet.
Pawikhawihna
leh chhiattawhna chanchinthar kan sawizui(comment) dan ah hian a pawikhawihtu
tihuangtau zawng emaw, a chhiattawka te rilru tina thei zawnga tawngkam rawlh
leh hman tum loh hram a him khawp mai. I tawngkam khat lek khan pawi thui tak a
khawih thei tih hria la, fimkhur leh fim takin khawvel hmasawnna hi hmachhawn teh.
No comments:
Post a Comment